Twitter @vvdedoale
Prins 2012
- Details
- Hits: 141
Prins Mike d'n Eesjte
(Mike Vinclair)
Dit e-mailadres wordt beschermd tegen spambots. JavaScript moet zijn geactiveerd om het te bekijken.
Oetgeroupe: 7 jannewari 2012
Vandaag, 7 jannewari twee-doezend-en-twellef
‘t vastelaovessezoen is al bienao oppe hellef
de drie keuninge höbbe v’r gister eindelik heivisj kènne sjikke
en ‘t is ongeluifelik wie langzaam de klok vandaag haet kènne tikke
Miene veurgenger Math haet uch sjus nog vertèld
wie ‘t nao zien Prinselik jaor mit häöm is gesjtèld
welke sjoon dènger hae allenej waal neit haet gedaon
mer vanaaf noe zwej ich de Doale-scepter, bepaal ich wie de vastelaovend dit jaor gevierd zal waere gaon
Vraem bèn ich neit, bekènd zellefs veur de meesjte
nao maonje van zjwiege sjtaon ich hie es Prins Mike d’n eesjte eine druim dae ich jaore mit mich mit höb gedrage
is noe oetgekomme, mich heurt g’r neit klage
Miene pap sjrif zich Vinclair, en Juul heisj ‘r van veure
is lid van Doale, en leut bie ‘t dörpsplatform ouch van zich heure van ‘t besjtuur van de sjtichting gemeinsjapshoes is hae de kapitein en bie de sjötte deit ‘r sjeite, dat vundj ‘r ouch nog fijn
Mien mam Annelies is gesjneje oet zuver bèssemehout
en al jaore geleje mit de pap getrouwd
Zie is ongertösje ein richtig daolinneke en sjus wie pap betrokke bie ‘t gemeinsjapshoes
Zie pots bie fysio Lömmerich mèr zörg baove-al veur de dènger in hoes
Mien bräörke Davy is zeker ouch neit onbekènd of onbesjpraoke hae waor metein verkoch wie ‘r de eesjte keer aan zien sjötteträöt haw geraoke hae is sjilder in sjpee en dan neit wie Piccaso of van Gogh, mèr geweun in en om hoes hae vriet mit Stefanie mer sjleup ummer oppe Vredeslaan in mien, vanaaf vandaag, Prinselik hoes
Wae mien familie is weit g’r òngertösje, höb ich uch sjus oet de duik gedaon mèr ich wil uch ouch veursjtelle aan Mandy, ‘t Louvervruike dat naeve mich zal sjtaon
Dat ich häör hie ònger aan dees bühne zoug sjtaon is alweijer 4 jaor geleje in òzze tied same väöl mitgemaak mèr nog ummer heel tevreeje
Same zulle veer de kommende tied väöl poloaises veurop gaon loupe mer eesj mot ich mien eige vleisj nog aan uch verkoupe
Dat ich Mike heisj is niks nuujts en dat ich van de Vinclair bèn waor ouch al bekènd noe nog ein anger wat ich zoal doon zodat g’r mich dalik ouch gans rigtig kènt
Op neuge augustus 1989 sjònk mam mich ‘t eesjte laevesleich
al 22 jaor ein heugelik feit òndanks dat zie dat destieds op Gelaense baojem deig
Heel get jaore maakde ich op ‘t voetbalvèldj jeder waek furore ònger de lat en in de kirk höb ich es mesdeiner eine sjone tied gehad
Bie Digisound regelde ich same mit vors Peter ‘t leich en geluid veur väöl orkèste en bie de EHBO doon ich maonjeliks mien reaniamsieoefeninge tèste
‘ne ganse houp tied besjtee ich de lètste tied aan ‘t opleide van miene hòndj en veur mien werk loup ich es beveiliger op de gèkste plaatsje ròndj
G’r wet noe waal mit wae geer te doon höb, wae hie noe veur uch sjteit
G’r wet noe waal wae uch zal veurgaon deze vastelaovend, wae noe proklamaere geit
Dus lèt goud op luuj, sjpits uch ore, loestert goud en nog väöl meer
nao wat ich uch noe gaon vertèlle, ich Prins Mike d’n eesjte, ich proklameer
ten eesjte:
Dat noe de verboewing van de kleine zaal hie in ‘t gemeinsjapshoes ein feit is en de planne veur de aanboew van ein opsjlaagruumte weijer oet de ieskas zeen gehaold, d’r ouch haopelik weijer meer gebroek geit waere gemaak van dees lokasie. Es Sinterklaos neit meer de enige is dae hiej wurt ontvange sjtop ‘t besjtuur misjien mit in ‘m te geluive.
ten tweede:
Dat noe de vastelaovesvereiniging de lètste jaore toch waal get gedaald is in gemiddelde laeftied en noe zie de wiesheid weijer in pach haet om de vastelaovend op ‘n gouw menaer te besjture, zie dit besjture drie daag laote veur wat ‘t is zodat zie de vastelaovesdaag same mit mich kènne viere oppe dansvloer. Ouch zie höbbe rech om vastelaovend te viere!
ten driejde:
Dat noe ‘t derewelzijnsentrum defenitief van de baan is, veer wèthawwer Meekels ein paar nuuj sjoon koupe. Hae houf neit meer in de wage te sjtappe om de dere in ‘t door häöm zo geleifde sentrum te gaon te bezuike, ‘t ligk veur häöm noe op loupaafsjtandj.
ten veijerde:
Dat veer de senatore van de Auwt Prinsegarde allenej verzeen van eine nuje diepvries. Zie höbbe nog gèt aeteswaar euver van ‘t frühsjoppe.
ten viefde:
Dat veer gaon probaere de 40 daag van de vaste tied nao vastelaovend mit zien alle zo väöl muigelik te laeve op èppel, appelmous en appelsaap. Es dit goud bevilt kènt g’r in septèmber mit de appelaksie van de sjötterie al eine veurraod in sjlaon veur volgend jaor.
ten zösde:
Dat Vors Peter in de leer geit bie de vrouwluuj van de raod. Es hae dao drie aovende mit Desiree haet geoefend in ein klèdje zonger tèsje, hiltj hae bie ‘t bedanke van artieste de hènj misjiens volgende keer urges angesj es in de boksetèsje
ten zevende:
Dat noe veer 10 jaor nao de inväöring van de euro bie Birgit nog ummer ein-vief-en-zèstig betale veur ein pilske, veer bie ‘t èllef jaorig jubileum allenej eine op häör koste mouge drènke
ten agste:
Dat noe de sjwaegelebend internatsjonaal aan de waeg aan’t tummere is, de sjötterie ummer wiejer nao sjöttefeeste geit en de bòndj van awwer luuj neit eine mer twee keer per jaor nao de breifabriek geit, ‘t GBL mer èns mot gaon dènke aan de aansjaf van ein touringcar. Misjien dat deze aansjaf de voetbalklup insjpireert ouch gebroek te gaon make van dees bös. Daoveur zulle ze eesj waal ‘n paar keer motte promovere want om nao Obbeeg of Einekoeze te gaon is zo’n bös väöl te priezig.
ten neugende:
Dat noe de doodsjtriedkirmes door de inzat van ein paar vereinginge weijer gans trök van weggewaes is, ein paar anger vereiniginge zich kènne gaon insjpanne veur de kirmes mit de paosje. Bonneverkoup gein probleem: Frans en Jack höbbe ervaring genog en doon ‘t gaer.
ten teende:
Dat noe zie mit de feesdaag ruumsjoots ervaring haet opgedaon in ‘t ophange van vaenkes aan lampepäöl, buurt Zuid-Wes mit de vastelaovend alle lampepäöl langs ‘t gedeilte van de optochroete door hun buurt zal versaere mit rooj, gael en gruin sjlingers.
ten ellefde:
Dat noe veer nao 25 jaor eine nuje pesjtoor höbbe gekrege, veer einmaol per jaor mit zien alle nao de kirk gaon. Laote v’r beginne mit de vastelaovesmès!
Dit zeen ze dan, dit zeen mien wètte, de wètte die ich oetgesjpraoke höb ich vraog uch grif ze mit eine watervaste vilsjtif, in uch gèkke narreköp ich zal de bok besjtiege, ich zal de paerd sjtrak in de teugels sjlaon ich zal same mit de wieze raod, dit jaor de vastelaoveskoetsj besjture en zal sjus wie al mien veurgèngers probaere mich waardig d’r door haer te sjlaon
Zònger Uch zal mich dat neit lökke, Uch höb ich neudig, geer zeet mien fundamènt de basis van ‘t viere van de vastelaovend, wie allein dat hie in Lömmerich kènt
Door Uch leif Doale, leif Doalinne en ouch luuj van boeteaaf gekòmme viere veer hie al jaorelank eine sjone, zuvere en zelige vastelaovend en jao ouch mit dank aan Uch wurt de bok van die Prinsekoetsj zo gaer beklòmme
Ich ben d’r klaor veur, höb d’r zin in, sjtaon te popele van ongedöldj en van gelök ich gaon uch loodse door de vastelaovend en brèng uch esjelegousdig pas weijer trök
in deze wèrkelikke waereld vol van onrech en van kaod wo-in veer laeve, wirke, zörge, leifhöbbe, soms gek doon en ouch feeste dae waereld, dae ich de kommende zös waeke aeve veur zolang ‘t is dae waereld laot
Ich höb mien eesjte weurt es Prins gesjpraoke, Ich höb mien vastelaoveswèt geproklameert
Ich ben Prins Mike d’n eesjte dae uch mit dudelike weurt haet laote heure wae dit jaor ‘t Doaleriek regeert
Lömmerich Alaaf!
Gegaeve op 7 jannewari 2012 in ‘t waope van Lömmerich,
Prins Mike d’n Eesjte
Prins van ‘t Doaleriek
Prins van Lömmerich
