Twitter @vvdedoale
Jeugprins 2012
Lömmerich, 15 jannewari 2012
In ein euvervol Gemeinsjapshoes is Marco Lebens oetgeroupe es JeugPrins Marco d'n Eesjte.
JeugPrins Marco volg daomit JeugPrins Bryan d'n Eesjte op dae woord opgenomme bie de Auwt Jeugprinse.
Jeugprins Marco d'n Eesjte zal saame mit Prins Mike d'n Eesjte recepsie hauwte op Zaoterdig 21 Jannewari in de Doale Tempel (Gemeinsjapshoes) te Lömmerich. Aansjloetend Prinsebal.
Proklemaasje
van Ziene Doorluchtigheid
Prins Marco d’n Eesjte
JeugPrins van de Daole
Potverdrie, noe sjtaon Ich hiej
Nondepie, Mich rammelt de prie
Öpke döpke, kroekesjtöpke
’t Duzelt Mich in Mien köpke
Miene naam höb Ich sjus heure roupe
Doe bèn Ich mer nao veure kómme loupe
Wós neit goud waat ‘r allemaol gebeure zouw
Mer dach waal, dit is waat Ich ummer al wouw
Deze daag maak Mich beruimp ónger uch allemaole
Tot Prins bén Ich benuimp, JeugPrins van Ós Daole
Greutsj en sjtols bén Ich deze troon opgeklómme
Miene allergrootste druim is daomit oetgekómme
Dèkser höb Ich Mich dat sjtiekem veurgesjtèld
Es Ich saoves in bèd meinig sjäöpke höb getèld
Wie ’t zou zeen óm hoog in de lóch te kènne sjtaon
Wie nónk Leon en naef Roy dat oug höbbe gedaon
Óm dan de kermelle aan d’n hemel te laote sjanse
En de appelsiene mit sjtraolende sjterre te zeen danse
D’r kènt tich toch niks sjonesj pessaere op deze aerd
Es zo te mouge triomfaere wie eine keuning te paerd
Mer eer Ich es Marco d’n Eesjte euver uch kèn regaere
Wil Ich Mich eesj effe in ‘t kort aan uch presentaere
Lebens is de naam dae Mich veur èllef jaor is aangebaore
Wie Ich es einige zoon van Hen en Tanna bèn oetverkaore
In de jubeleijemsjtraot sjteit Ózze doorluchtige donjon
Ein klein kesjteelke, mer allein dan zónger ein balkon
Sjtried en ónmin, dao vènje Veer gaar niks aan
Vree en vrundsjap sjteit bie Ós wiet baovenaan
Thom, Patrick en Wessel zeen Mien kameräödjes
Sjus wie Bram en Joep: Veer zeen ech gein zäödjes
‘t Kattekaod sjteit Ós rech veur Ózze kop gesjreve
Mer V’r zeen nog ummer op ’t rechte paad gebleve
Voetbal is Mien hobbie, eigelik sjport in ’t algemein
Zo sjpeel Ich bie Ós voetbalclub es sjpits in de D ein
Ronaldo is Mien grote idool en Ich bèn fen van Miene pap
Christiano maak gool nao gool en pap skoort aan de tap
Ich bèn oug ein bietsjke muzekaal óngerlach
Neit mit awwe kraom van Beethove of Bach
Mer housemeziek, dao kèn Ich waal get mit
Es t’r mer ein pittig en ein sjtevig ritme in zit
Es tamboer bèn Ich bie de drumbend van de sjötterie
Mer op sjöttefeeste sjpeel Ich meistens Mien eige pertie
Solo en gans allein trómmel Ich de sjurie van de wies
En gaon dan dèkser heivisj mit d’n eesjte of d’n erepries
Vastelaovend is veur Mich ein verhaol op zich
Soms in Zitterd, mer veural oug in Lömmerich
Optoch, appelsienesjmiete of op ‘t Pletsjkónsaer
Ich zèng, Ich sjprèng en maak dan veural plezaer
Potverdrie, noe sjtaon Ich hie mit ein rammelende prie
Mit de pap en de mam en Miene adjedant aan Mien zie
Mit eine plesante septer en ein sjteek mit fesantevaere
Moug Ich noe Miene liefsjpreuk aan uch proklemaere
Rood-gael-gruin zeen mien kleure
Deze vastelaovend geit ‘t gebeure
Awt en jónk, dik, dun, groot of klein
Ózze vastelaovend is veur jederein
Maak daoróm väöl sjpas en plezaer
Mer gedraag uch op ein fien menaer
Leer dees weurd hel op van boete
Tot dat dien ore d’r van gaon toete
Pas dan kènne Veer richtig viere gaon
Pès ’t op esjellegounsdig is gedaon
Öpke döpke, alle koekeralle in ‘t töpke
Wae lös gein sjtertje in zien söpke
Drie maol boem en oug nog paaf
Veur ózze vastelaovend, ein alaaf
Gegaeve in de gelagkamer van Herberg d’n Doal
Op viefteen jannewarie tweedoezend en twellef
Marco d’n Eesjte,
JeugPrins van de Doale,
Prins van Lömmerich
