Twitter @vvdedoale

Historie v.v. De Doale

In Lömmerich wurd al van veur ’t jaor 1900 geörganizaerd vastelaovend gevierd. Getuug hiejvan is de vastelaovesgezèt oet 1900. In dat jaor is dees gezèt oetgegaeve door de ‘Lömmeriger Toete-Club’. Aan dees vereiniging herinnert nog de naam van de vastelaovesgezèt van de tegewoordig; De Taoterie. In dees eesjte gezèt sjteit es kopteks “DE DAOL OET TE LIJMBORG” Zoväöl is zeker dat Lömmerich toen al get mit Doale haw. Deze vaalzjwarte vogel (in ’t Hollesj aug waal kauw, roek of torenkraai genuimp) kaom in grote getale veur in de ómgaeving van de kesjteeltaore.

In ’t jaor 1927 haet dezelfde Toete-Club waer ein gezèt oetgegaeve in óngeveer dezelfde opmaak. Irges in de daonaovolgende jaore is in Lömmerich de eesjte richtige vastelaovesvereiniging opgerich mit es naam De Doale. Helaas is euver dees periode in de Lömmerichse vastelaovegesjiedenis gein informasie meer veurhenj. Aug is ónbekènd wóróm dees Doale zeen oetgesjeid te besjtaon. Dit is irges in de jaore 30 gewaes en mesjien is ’t oetbraeke van d’n aorlog raeje gewaes óm de patsj aan de wilge te hange.

Ènnige jaore nao ’t ènj van de aorlog, in 1951, woord door ein in ’t laeve geroupe wirkkómmeté eine nuuje raod van èllef gekaoze óm vanaaf dan waer es Doale door ’t laeve te gaon. In de toenmaolige zaal Coune aan de meulesjtraot woort de nuuje raod aan de luuj van Lömmerich veurgesjtèld. Lei Widdershaove (vors), Zef Jetten, Pierre van Rooy, Andrees Deuss, Thei Derhaag, Karel Fieje, Lei Paulsse, Cleef Helwege, Zef van Cleif, Wiel Cardinaals en Pierre Lomme waore de men van ’t eesjte oer. Drek nao nuujjaor woord eine nuuje prins oetgeroupe. Prins Mil 1e (Wagemans), de latere burgemeister van Munstergelaen ging es eesjte Prins veurop in de vastelaovend van 1952. Aug trok dat jaor waer eine optoch door de sjtraote van Lömmerich. In 1953 woort Mil 1e opgevolg door Prins Jules 1e (Creemesj) dae vanwaege de watersnood in Zeelandj aug in 1954 prins bleef.

In 1955 woort  Jan 1e (Daams) Prins gevolg door Harie 1e (Willems) in 1956. In  1957 woort Sjra 1e (Vleeshouwers) Prins, en zou dat aug in ’58 en ’59 blieve. Aug ziene opvolger Chrit 1e (Savelkoul) bleef meer es ein jaor prins van de Doale (1960 en 1961). In 1962 maakde de Doale zich mit prins Henk 1e (van Cleif) op veur ’t eesjte jubeleijem. Op 26 en 27 jannewarie en 2 fibberwarie 1963 vierde me ‘t 1 maol 11 jaorig besjtaonsfees mit jubeleijemprins Mart 1e (van Cleif). De scepter van vors Doal ging euver nao Zef Jetten. Woort ’t jubeleijem nog groots gevierd, ’t jaor d’r nao kreeg me geine ganse raod van èllef meer oppe bein. In 1964 woort geine Prins oetgeroupe. Waal woort in dit jaor oppe leger sjool de eesjte jeugprins van Lömmerich, René 1e (Corten) oetgeroupe. ’t Vastelaovesvuur leek aevel gedouf in Lömmerich. Toch woort in dat naojaor eine doorsjtart gemaak.

De Doale reipe in 1965 waer eine Prins oet in de persoon van Leon 1e (Kroone). De Raod besjtóng oet ein klein deil van de aw Doale aangevölt mit ein aantal nuuj name. Ónger angere Tjeu Salde, Harie van de Bergh en Jan van Hegelsom waore nuuj. Vors Doal waor Lei Sjrieje. In 1966 woort Wim 1e (Sjrieje) Prins en dae woort in 1967 opgevolg door Leo 1e (Meijers). In 1968 is nog waal eine Prins oetgeroupe in de persoon van Albert 1e (Fieje), mer de óngergank van de vastelaovesvereiniging waor al op henj. De meinigsversjille tösje De Doale en Prins Albert veur de vastelaovend in 1968 waore de dröppel dae d’n top dei euverloupe en nao de vastelaovend van dat jaor laog de ganse zaak oppe vot.

Ein jaor geine Prins waor al erg genóg, mer geine optoch dat zou neit kènne. Zo dachte vief beweunesj van de nuuj kesjteelbuurt in 1969. Ziej noume ’t veurtouw óm veur de kènjer eine optoch te organizaere. Hunne inzat woort beloond en de optoch woort ein groot sukzes. Nao de vastelaovend van 1969 woorte de köp biejein gesjtaoke óm ein nuuj vereiniging op te richte.

De vief van 1969, Ben Haustermans (vors), Gerrit Vloet (penningmeister), Piet Cleber (sikkretaris), Joep Prick en Ad van Doren. zuikde luuj d’r biej óm waer mit eine volwaerdige raod wiejer te kènne gaon. De gróp woort oetgebreijt mit awt-gedeinde Tjeu Salde, Harie van de Bergh en Harie Willems. Aug nuuj gezichte koume biej de raod; Willie Smit, Frits Verdonk, Roel Verschoor en Jaques Arets. Vanaaf toen woort waer eder jaor eine Prins oetgeroupe en eine optoch trok door Lömmerich.

Es eesjte prins van de nuuj Doale woort Jack 1e (van de Bergh) oetgeroupe en in dat eesjte jaor woort Nico Jessen oet de Baovesjtraot buutekampiejoen. Me haw op de eesjte resepsie al metein get sjpisjaals te viere. In de volgende 39 jaor woorte drie jubeleijemfeeste geviert. In 1981 (Ger 1e Sjrieje), 1992 (Harie 1e Teeuwe) en 2003 (Ralph 1e Cobben) sjtóng me sjtil biej ummer eine nuuje meilpaol dae me es vereiniging bereikde. In 2014 haope de Doale ‘t 4 maol 11 jaorig besjtaon te viere.